............. (الفهرسة والعنونة) ................
امشي على ذاك الطريق الموحش وكلي حذر
يا للاسـف خاب الـرجا والمـوقف اللي برهنه
مليـت من كثر اشتـياقي واغـتـرابي والسـفر
بين المدن ذا مستحيل وذيك باتت ممكنه
تعبـت من طول المـسافه واللـيالي والـسهر
ليـت الامــل فيـني يقـدر هـالتعب او ثـمنه
من يومها شفت الخريف يعاكس احلام الشجر
رغم اختلاف الازمنه في نفس ذيك الامكنه
قمت اجمع افكاري وادون شي في بالي خطر
في اول اسطـور الورق من دون لفظ الالسنه
دونت حلمي في مـساحة دفتري لنّه كبر
ضاقت هواميش الورق والفهرسة والعنونه
واخترت اسمٍ خارجي وسط الغلاف و مختصر
اسمه (اسيرن للقمر) والفقد هو من دشنه
مكتوب اشوفه في مواطن رحلتي حكم القدر
له لون واحد ثابت و عكس القلوب املونه
شف كل شي يا صاحبي يفنى ولو طال الدهر
جمـله تضمد لي طعوني والجروح المزمنه
لنّي سالـت وما لـقيت لغيبة اشـباهي خبر
قررت اعـزي غـربتي ما دام نفـسي مـؤمنه
حفرت حفره لاشتياقي قمت وازيت الحجر
خلف الحجر كفنت شوقي والعزيمة تدفنه
والـذاكره تبدا تعـيد احداث وثـقها النظر
بعض الفرح بعض الالم ومن المآسي عينه
اللي كسر عكس اللذي ضحى لغيره وانكسر
الاول اللـي قـد جـنا واوجٰاع غــيره هيـنه
والثاني اللي صدمته في داخله تترك ضرر
شفـني انـا ما بيـنهم والتـضحيه بـي بـينه
كنت احسب ان التضحية في عالمي تترك اثر
للي اضـحي له ولكن ذي حقـيقه معـلنه
التضحية كانت لمن مثله مشاعر تحتضر
درس وحفـظته وافهمه واتذكره واتمعنه
احلام اخـفيها حـذر واوهام افضـحها قهر
ويبان لك من قد ضلمني كان قلبي موطنه
يمكن اعيش العمر اهوجس او اهذري بالشعر
لن الـشعر منفا لمن مـثلي وفـكري ادمـنه
يا صاحبي هذي علومي شي منها لك ظهر
واللي بقا لك ما ظهر فولاذ صدري مخزنه
ان جاك من يشكي غيابي ينظم اشعاره درر
قلــه تــرى ما للمـشاعر غير قــبر و تســكنه
في آخر السور العتيق اهناك كانت تحتضر
كانت مشاعر خافقي والدفن قصه محزنه