المارد والمصلح

يالاقي الفانوس ابد لا تفكّه
وبالهون فركه يمكن المارد ايفيق

واطلب ثلاث من الاماني وحَكّه
ولا تشتكي لي كربة الوقت والضيق

قله ابي للريم هلحين سكه
ابختصر منها تعب قمّة اطويق

يوم التقي وياه من دون شكّه
وايام تاتيبه على صوت تصفيق

محدٍ عرف اسمه ومشهور نكه
(ونة خفوق) اللي مشا حوله يويق

الزوم من شافه تجي فيه لكّه
وتبدا بصدره ونّته والتشاهيق

(والثانية)بيت ابمشبّه ودكّة
تبهر عيوني قبّته والتعاتيق

به مجلسٍ للضيف ابد ما اصكّه
واسمع به الابيات عذب الطواريق

يطرب به اللافي و لو فيه تكّه
من همه اللي بعثر احلام ويعيق

ما يفرك اكفوفه و يضرس بفكه
بينه وبين الهم عزله وتفريق

والثالثه يدّ العذاري تشكّه
ماله مكينه او تروس وتعاشيق

لا صار كنّه فوق صدري بلكّه
ماعاد ابشكي ضيقتي للمخاليق

اقول له عجل وبالصوت ادكّه
وافي ومن رب السماوات توفيق

ايطير بي ما بين طيبه ومكّه
ابساط ريح ابلا جناحين حليق

اطلب من الله الفرج وسط بكّه
هو شارحٍ ضيق النفوس المغاليق

والمارد اللي طال حبسه وضكّه
في داخل المصباح جنب الاباريق

ماهو بخادم له يبي منه فكّه
ومابينهم ثارٍ قديم ومواثيق

حرّر قيوده عند ربعك وزكّه
بيّن جهوده للرجال المطاليق

ثم ودعه قبل الليالي تعكّه
خلّه يطير بعاليات الشواهيق