صفحه جديده

دوّنت لي صفحه جديده مع الناس
يمكن عدوّ الامس يصبح صديقي

حطّيت حبرٍ في قلم وسط كراس
ودوّنت آلامي وحزني وضيقي

لو بعدها قلّت عزومي والانفاس
عرفت كيف اصمل واكمل طريقي

يا كثر ما عيني غفت حزّة انعاس
سايست عيني قلت يا عين فيقي

اشوف دربي مرتفع كله اقواس
ويشب صدري من تسارع شهيقي

ما شفت ذرات الهوى داخل الكاس
وادري لانه به هوى نشف ريقي

شفت التناقض بين حلمٍ وهوجاس
درسٍ حفظته للوهم والحقيقي

اكيد فالقلعه صناديد حراس
اصابعي وحروف بوحي فريقي

ما دام شطرٍ عذب راعيه حساس
اتبختري يا قافيه بي وليقي

ما عاد باقي خانةٍ وسط قرطاس
والنحت في الماستي وبعقيقي

ما دام عقلي ساكن ابحجرة الراس
نويت المّع بالمحاسن بريقي

واللي صبر بمصيبته قال لا باس
ولو زاد باحسانه فهذا رفيقي