يوميات زوجة مفروسة االمنيوم السابع "من بره رخام ومن جوه سخام "

السلام عليكم يا حبايب قلبي وحشتوني ووحشتني الهرجه معاكم تدورا ما لي الا إنتوا افضض لكم فرساتي اللي تحصلي واللي أشوفها
اليوم بحكيكم عن فرسة من فرساتي
هذا يا جماعة الخير كنت مرة رايحة مشوار مع ابو ايمن واحنا واقفين بالاشارة جات ذيك السيارة الفخمة تلمع لميع واللي جوها واحد يقول يا ارض اتهدي ما عليكي قدي.،،،
الا شوية ينزل القزاز حقه ويرمي وساخة في الشارع
وه ياندامتي ولا بالكشة اللي كاشخها والسيارة الفخمة اللي راكبها. على رأي المثل من بره وردة ومن جوه فرده
اخيي على ناس زي كذا ما يحترموا حرمة الشارع ولا الأماكن العامة والله عيب كذا
الشي ذَا دائماً اشوفه حتى في الاسواق تلاقي البزرة معها حلاوة ولا بسكوت وتفك الورقة وترميها في الارض والام جالسة فاتحة فمها دي سكاحانه لا تقول لولدها عيب ولا حتى تكلف خاطرها انها تشيل الوساخة اللي رماها ولدها
حتى وانتوا بكرامه الحمامات العامة يقرف الواحد يدخله من الوساخة تلاقي المناديل مُرِمية في الارض وموجودة الزبالة ،،، يا ادمية ايش يضرك ترمي وساختك في الزبالة
وايش ذنب العامله مسكينه كانها مكينة تنظف الحمامات كل دقيقة
وكله كوم وحمامات المساجد وانتوا بكرامه اللي في الطرق السريعة كوم
ريحة ووساخة وشئ يخلي الواحد يدوخ
مرة كنّا مسافرين بر وجاء وقت الصلاة والله ياجماعة الخير دخلت المصلى اصلي ما قدرت من الوساخه وريحة الحمامات الى واصلة المصلى فين وزارة الأوقاف من كذا
حتى البحر تجلس الناس وتتونس وتقوم وتخلي وساختها. طيب واللي يجوا بعدكم ايش زنبهم مايعرفوا يجلسوا
ايش فيها لما تجيبوا معاكم كيس زباله تلموا الوساخة حقتك
اااه على ايّام زمان وحوارينا القديمة تخرجي الزقاق ماتلاقي ضرة فيه الكل بتساعد وينظفوا قدام بيتهم ولا جاء العصر قام الصبي يرش موية عشان التراب لا يطير
النظافة وصى عليها الاسلام وعلى قولتهم النظافة من الإيمان ولازم نعلم اولادنا النظافة والمحافظة على الأماكن العامه من هما صغار
احنا مو احسن من بلدان الغرب احنا مسلمين وربنا ورسولنا عليه السلام امرنا بكذا والحمدلله انه الكورنيش الجديد صار فيه رقابة واللي يحاول يخرب شي يحطوا عليه مخالفة ويدفع فلوس عشان يبطلوا الاهمال ويتحملوا المسئولية.
يا ناس اعتبروا الشوارع والبلد ذَا بيتكم إنتوا في بيوتكم تَررموا الوساخة في الارض لا طبعا ،،، زي ماتحافظوا على بيوتكم حافظوا على بلدكم لأنكم إنتوا عنوانها
معليش طولت عليكم في هرجتي وفرستي وبالله اشوفكم على خبر اذا ربنا أراد