يوميات زوجة مفروسة ،، صباح الخير ياجارى ،، اليوم الخامس

(صباح الخير يا جاري انت في دارك وانا داري )
السلام عليكم
كيفكم يا حبايب ايش اخباركم ؟
كيف سيد بيتكم وحبايبكم ان شاء الله بخير ؟
الْيَوْمَ كالعادة بحكيكم فرسة من فرساتي
وعلى قول المثال :كومة حجار ولا هذا الجار
اااه هذا يا ظطويلين العمر والسلامة قبل لا ننقل في الفيلا حقتنا كنّا ساكنين في البلد شقة البغدادية كانت الحياة حلوة والقلوب على بعضها والجيران اه على جيران زمان كانوا حسبةالاهل وأكثر ابو ايمن اتجوزني وانا عندي ١٥ سنة لسة جاهلة وأهلي في مكه وهذي سنة الحياة ربي أكرمني بجيران كانوا زي اهلي وزيادة كنت لما أولد كل جارة عليها يوم تجي عندي وتسوي لي العريكه والمجلب اللي يحبوه قلوبكم. ويحضروا الغذاء ليا ولابو ايمن. كانت امي رحمة الله عليها تجيني تقولي انا مالي عازة عندك جيران الهناء اَي والله جيران الهنا عمري ما شفت منهم زله أو شي بطال وكانوا اولادنا مع بعض كل وحدة تزاكر لولد جارتها في المادة اللي هي شاطرة فيها. كنّا نتقاسم حتى الخضرة ومقاضي البيت حتى لما نقلنا وافترقنا كل واحد في بيتها الملك عقبالكم نتواصل. اول ما سكنت في الحي الجديد ذَا بِسْم الله الرحمن الرحيم استنيت يوم يومين دحين الجيران يدقوا يتصلوا ولا احد حتى كلّف خاطره يرحب بنا وه يا ندامتي !!!! هذا ايه ذَا حتى سلام الله مافي يا لطيف،،، مرت الأيام وجات الإجازة وبدأوا البزورة يتفلتوا في الشارع كانهم نمل ما تسمعوا الا واق ويق ودخل علينا رمضان وكان وقت ظهر. الدنيا هجبه ما نسمع الا صوت كنه قنبلة قومت ابو ايمن قلت قوم يا راجل هذي قنبلة في حارتنا قام قالي :يعني تبغيني اموت اندر تجيني شظية القنبلة يا حرمة ونسمع الصوت الثاني و اوايق من الشباك الا اولاد الجيران جالسين يلعبوا طراطيع ،،،، طراطيع في هذا الوقت والجو حار زمهارير فين اهلهم طالعين ذَا الوقت قلت لأبو ايمن انت لازم تكلم ابوهم لما تطلع تصلي العصر ما يصير كذا الرسول عليه السلام وصى على سابع جار قال لي ابو ايمن : يصير خير وسكتنا على ذي الحكاية وتتكرر الحركة نفسها على بعد المغرب وقت الراحة. ياهو مايصير كذا ما في مراعاة لمريض ولا لجار وكله كوووم والطقطيقة كوووم ثاني حسّيت كنه في راسي هواند بعيد عنكم قلت ما بدها لازم احد يتكلم مع امهم ولا ابوهم رحت لأبو ايمن قلت له :يا هو انت كلمت ابو اولاد الجيران ولا لا؟ نكس راْسه وقالي :ايوا كلمته وقالي الأولاد إيجازه وخليهم ينبسطوا ،،،، ينبسطوا في الظهر الأحمر وغير كذا ازعاج علينا استغفر الله العظيم يارب وجلسنا على ذَا الحال صراخ وطراطيع وشئ يتعب القلب وعدى علينا رمضان وارتحنا شوي لماسافروا ديرتهم على قولتهم ورجعنا للهدوء ولما رجعوا رجع الحال اقوم من الاول اللي يصبر قلبي بس ،،،، ويوم من الأيام اسمع الجرس يدق حق البيت ونزلت اشوف مين الا جارتنا شايلة بزرتها وهي كلها دم خرجت بشرشف الصلاة اشوف قالت لي دخيلك بنتي كانت تلعب وسهتني ودخلت المطبخ ولعبت بالسكين وانقطعت يدها وزوجي اتصل عليه مقفل جواله وانا أحط قنعتي على راسي وأخلي كومار يشغل السيارة ونروح اقرب مستوصف وخيطوا للبنت يدها ورجعناهم للبيت لما جاء المغرب صليت المغرب ورحت جبت لعبة لبنت الجيران ورحت ازورهم مهما كان ذول جيرانا ولهم حق وواجب دخلت على الجارة وسلمت عليها وهي تجلس تتشكر مني وماهي عارفة كيف ترد الجميل قلت لها : ولا جميل ولا شي احنا جيران والنبي وصى على سابع جار وكمان أبغى اقول لك شي يا جارة. اولادك الله يصلحهم دائماً يعملوا ازعاج في الشارع ومرة كمان بنشروا كفر السيارة حقتنا غير لما يلعبوا كورة في الشارع كسروا لنا انوار الحوش اولا خطر يا حبيتي عليهم وثانيا ازعاج في أماكن مخصصه للعب الكورة أو خليهم في الحوش حق البيت يلعبوا لازم اولادك يتعلموا احترام الجار وان الجار له حرمه مو لازم يتعدها قالت الجارة :والله انا مكسوفة منك ومن تصرفات اولادي معاكم ومعاكي كل الحق وابشري ما يصير خاطرك الا طيب قلت لها يا حبيبتي احنا جيران وأهل ان شاء الله نساعد بعض على الحلو والمر. وان شاء الله يصير تواصل معانا وعيش وملح وطلعت من عندها وانا مرتاحة الحمدلله وصرنا سمن على عسل وأولادها سجلتهم في نادي الصيفي حق الحي وأصبحنا نسال على بعض الحمدلله وعملنا دورية في الحي كل أسبوع نتجمع عند وحدة والحمدلله رجعنا ايّام زمان والجيرة الحلوة
وهذي كانت فرسة من فرساتي اللي ولت وانتهت واشوفكم بكرة على خير