ياللي ضمنت احترامي لك وتقديري
الشاعر / علي أبو كيلة
ياللي ضمنت احترامي لك وتقديري
وش فيك صار اهتمامك مختلف وضعه
.
من اول آنا اعتبر نفسي مثل غيري
احضى بتقدير رجلا يحترم طبعه
.
والحين يومك ضمنت احساس تفكيري
اشوفك انسان ثاني مختلف سنعه
.
ماهمك احساس كلماتي وتعبيري
تمضي حروفي ويوم السبت كالجمعه
.
اللي اشوفه كذا في حسب تصويري
هذا مزاجي ومتمرد على ربعه
.
واللي يصافح مقام الود وشعوري
يبقى عزيز المكانه طيب السمعه
.
واللي تغير حسب ميزان منظوري
اسجله في كشوف الهجر والقطعه
.
واللي يحاول يهمش بالفعل دوري
يبطي وهو ماشرب من منهلي جرعه
.
اعطيه وقته وكل الامر تقديري
مايحتمل نبذل المجهود ف الصفعه
.
يعني عليه الحذر من سوء تدبيري
من مبتدا الامر حتى وقعة الفجعه
.
الوقت علمني اصنع شيء تاثيري
يعود لأهل الوفاء والخير بالنفعه
.
هدوء الاحساس يعني شيء تطويري
اشوف الابعاد واحسب مدة الرجعه
.
ترى غموض النفوس احساس تبريري
مادام علم السياسه عندنا صنعه
.
ياللي ضمنت احترامي لك وتقديري
وش فيك صار اهتمامك مختلف وضعه
.
لاتحسب اني بنظراتك مثل غيري
مغفل احساس مايدري عن الصنعه
.
تراك مهما سرقت الضي من نوري
مهما تطورت يبقى نورك الشمعه