إهداء من أبو مشعل محمد ظاهر المخيمر

يالربع عن الشعر لي صده وسجات
اغيب عن نظمه سنينن عديده

والليله ان ماجني الابيات عجلات
قطعت حبل عروقهن من وريده

طاب المزاج وزان لي نظم الابيات
ونظمت من هاجوس فكري قصيده

فيها اتنومس والحكي له دلالات
موجهه للي فعوله حميده

في مدح عبدالله نعد السجلات
ابن مخيمر حظ منهو عضيده

لـ ابو مهند نقوتي للثمينات
في ذمتي حقه عليه فريده

يستاهل التكريم باعلى المنصات
وكلن على ماقيل فعله من ايده

الوافي اللي كاسبن للجمالات
انشهد انه بالمواقف وليده

كل الأمور الكايده له سهالات
يومنها في وجه غيره عنيده

يمنى الكرم راع الوفا والمهمات
راع العلوم الطيبه والسديده

علمه تعدا للجدي والمجرات
ونظرات عينه من شموخه بعيده

كفيت ياراع الفعول الجزيلات
وانشهد ان مثلك علينا فقيده