التواصل الصحيح اهم من الكلام لانه هو اساس الكلام يعني لازم تعلميه كيف يتواصل صح خطوه خطوه

احيان بعض الاطفال يحفظوا سياق الجمله وطريقه الكلام ونبره الصوت يحسسوا الاهل انه فاهم ويقول كلمات عشوائيه وهو مو مستوعب *الموضوع بالشكل الصحيح بس حافظ الطريقه وفيه اطفال ابدا ما ينطقوا لانهم مو فاهمين طريقه الكلام

في خطوات مهمه لازم يتقنها الطفل قبل الكلام حتى يكون نطقه صحيح وموظف وتكون هي المفتاح للكلام بإذن الله اذا الطفل لا يتكلم ..

١- التأشير على كل شيء *وتعرفيه باسم الشيء المأشر عليه وتسأليه ايش تبغى اذا عارفه ايش يبغى وتخليه يروح عند الشيء بمساعده كليه منك بالبدايه ويأشر *عليه وكمان الملابس والوانها مثلا طلعتي البلوزه تخليه يأشر وقولي بلوزه والمرحله للثانيه خليه يأشر وتسكتي شوي تعطيه فرصه اذا عنده شيء يقوله بعدين قولي بلوزه بالبدايه حتكون المساعده كليه ثم جزئيه ثم استقلالي بدون مساعده

وتخيريه تبغى بلوزه احمر ويأشر عليه وله أصفر ولما يختار البلوزه قولي لونها مثلا احمر وقولي البس بلوزه حمراء وهكذا ولو تخلي الموضوع ممتع احسن مثلا تهزي البلوزه لما يختار ومع هيييييه

٢ - الانتظار حاولي تنظري ما تستعجلي على الطفل يعني اذا قاعده تدربيه حاولي تسكتي بعد ما تنطقي الكلمه شوي وتأشري تعطيه فرصه انه يفهم انه هاذا دوره اتكلم لانه الطفل مو عارف متى يتكلم

٣- شاركيه اهتماماته مثلا اذا شيء يحبه حاولي تلفتي انتباهه فيه مثلا الفقاعات اولعبه مره يحبها *يكون هو المعزز وممكن مدخل لتعليمه امور كثيره والمعزز ينعطي للطفل وقت ما يستحق التعزيز يلعب شوي وتاخذيه تقولي اعطيني وتكملي معاه وكمان مره ثانيه اذا عززتيه تعطيه وتاخذيه عشان ما يمل منه ويتشبع ويصير ما يهتم فيه وممكن معزز اكل بس مو كله تقسميه صغار قد ما تقدري كل مره شوي *عشان بس تكسبي اهتمامه وبعدين حاولي تقللي كميه التعزيز ممكن بآخر التدريب ياخذ المعزز عشان ما يتعود على انه ما يسوي شيء الا بمعزز واستخدمي اكثر شيء المعززات المعنويه زي التصفيق والتشجيع والدغدغه والاشياء الي تحمسه

٤- سمعيه افكاره يعني اذا حسيته يبغى شيء لا تعطيه علطول قوليله مثلا *ابغى عصير *وارفعيه واذا جا يبغاه قولي اه تبغى عصير يعني كأنك فهمتيه وهكذا حاولي تكون جمل قصيره وواضحه مثلا جا يبغى تلبسيه جزمه قوليله *لبسيني الجزمه

٥- الطلب لازم يتعلم يطلب كثير وتعطيه فرصه انه يطلب لا توفري له كل شيء بدون ما يطلب وعلميه كيف يطلب يعني يمد يده بطريقه اعطيني والطلب يحتاج ان يكون عند الطفل حصيله لغويه عشان يطلب يعني كثري له الصور كل ما شفتي شيء صوريه عصير * كوب فاين *او افتحي النت وطلعي صور عشان يسهل عليه الطلب من اشياء يشوفها قدامه فيأشر على الصوره او يعطيك اياها ولازم تنطيقيها له وتسكتي شوي وتعطيه فرصه يقولها

٥- التقليد قلديه اول عشان يتواصل معاك بصريا بعدين خليه يقلدك ويسوي حركات زيك واذا ما عرف ساعديه المره الاولى مساعده كليه بعدين جزئيه يعني مثلا ترفعي يده وتتركيه ومع الوقت يصير يسويها بدون مساعده *بس *يشوفك تسوي الحركات يقلدك

* ٦- الاناشيد مثلا اختاري انشوده حلوه فيها حركات وابدأي نشديها له اول مره مو مشكله اذا ما تفاعل معك بس بالبدايه تعريف بالانشوده بعدين *قوليها له كل يوم وساعديه يسوي الحركات ومع الوقت يسويها لحاله وحاولي تسكتى بمقطع هو يحبه كانك نسيتي تسمى طريقه اكمال الفراغ عشان تعطيه فرصه لو يعرفه يقوله مثلا زي انشوده صفق صفق صفق احيان يقول ايه ايه اووه وهكذا

٧- اللعب الصحيح المتفاعل و دمجه مع الاطفال في اللعب وتعلميه كيف يلعب معهم واذا توفر عندك احد اكبر منه شوي يناديه عشان يلعب احسن ويكون معاه يساعده على اللعب في البدايه لين ما يعرف كيف يلعب معاهم بدون مساعده *فيجلس وراه ويعلمه كيف يلعب بالطريقه الصحيحه

٨- الاستقلاليه يعني حاولي تخليه يلبس من حاله في البدايه اكيد بمساعده كليه يدك ويده بعدين جزئيه ومع الوقت يتعلم من حاله مثلا خليه يلبس الجزمه من حاله اذا ما عرف بس شديها وبعدي وخليه يكمل وكذا مع كل شيء مثلا الاكل مسكيه الملعقه بالبدايه انتي معاه يدك بيده بعدين اتركي يدك لما يقرب لفمه *وقلوليله كل الى ما يتعود بالبدايه تكون المساعده كليه بعدين جزئيه بعدين يبدأ يتعلم شوي شوي من حاله يستقل بالاكل بدون مساعده واذا الطفل ما يقعد على الاكل حطي الصحن قدامه وقوليله كل واشري على الاكل واذا قام يحوس وما اكل وما رضى يجلس انتظري لين ما تخلص الوجبه *وشيلي الاكل من قدامه وريه الصحن واشري عليه *وقوليه خلاص مافي اكل ولا تعطيه وبعد ساعتين بالوجبه الثانيه تسوي نفس الشيء عشان يتعود على النظام وان الاكل لما ينحط قدامه ياكله واذا ما اكله ما في اكل

٩- الاشارات الوصفيه مثلا زي اكل ممكن تخليه يسوي زيك يحط يده على فمه ويحرك فمه كنه ياكل *وتقوليه اكل وهكذا

١٠ - حاولي تزيدي المفردات اللغويه عن طريق الصور وريه صور كثيره بس حددي كل يوم مثلا خمس صور

١١- شجعيه وحمسيه زي يا سلااااام الله هيييييه بطل شاااطر وصوتك لازم تخليه انه حماس *بيني له انه لما يتفاعل ويتواصل صح ان هاذي الاشياء لها معنى ويشوف اثره عليك *وحتىركزركز لما يسوي شيء غلط نبرتك لازم تبين انه زعلانه وحازمه

يعني لما تعلميه على شيء ويبدا يسويه ويطلب صح *او يقول الكلمه بمكانها الصحيح *شجعيه وحمسيه خليه يشوف انك فرحانه وانك فهمتيه وتعطيه الشيء علطول عشان يتحمس يطلع الي عنده اكثر

١٢- تبادل الادوار مره دورك ومره دوره بكل شيء مع الوقت تساعدك هالطريقه يصير لما يجي دوره يفهم انه تبغي منه استجابه فيطلع استجابه

١٣- حطيله عقبات عشان يضطر يطلب منك واذا ما عرف علميه مثلا شيلي لعبته قدامه وحطيها فوق او بكيس او كرتون وقفليه بحيث ما يقدر يفتحه ولما يجي يبغاه قوليله اش تبغى واسكتي شوي وخليه يسوي اشاره الطلب وقوليه ابغى لعبه عشان يعرف ايش يقول بالموقف هذا وهكذا عشان يعرف ايش يقول بالمواقف

١٤- احزمي على الطفل في السلوكيات والاوامر مثلا طلبتي منه ترك شيء معين تقولي اترك او فك ما يترك اول مره قولي الكلمه وفكي يده بسرعه وكرريها السلوك خليه يمسك ويفك وهكذا ومع الوقت بمجرد تقوليه فك حيفك او اجلس حيجلس او تعال حيجي واي امر ونفس النظام تتبعيه مع اي امر

١٥ - كلمه لا *الطفل لا يفهم معنى كلمه لا الا اذا ساعدتيه انه يفهم معناها مثلا صوري له الاشياء الخطره وحطي عليها اشاره x *مثلا يلمس الحار قوليله المس الحار لا *او اقطع الشارع لا *واربطي كلمه لا بالعقاب مثلا سوى شيء مو كويس علطول بنفس اللحظه تاخذه وتحطيه على كرسي وتقوليله مثلا امسك السكين لا وتقوليلها بحزم ولازم يجلس على الكرسي ٥ دقائق ما يقوم واذا قام ترجعيه حتى يفهم انه لا يعني لا لين ما تخلص ٥ دقائق وتخليه يسلم عليك وقوليه انا اسف ويقوم من الكرسي وهكذا استمري معاهلين ما يفهم كلمه لا ويصير بس تقولي له لا يوقف او يترك الشيء او تستخدمي عقاب الحرمان من الشيء الي يحبه وينحرم منه وتقوليه الشيء المطلوب منه وتقوليه مثلا احمد يقطع الشارع جوال لا وخوذي الجوال واصبري على السلوكيات الي يسويها من بكاء وتجاهليه واذا تكلمتي بس قوليه هدوء لين ما يهدا من نفسه بعدين رجعيله الجوال وخليه يسلم عليك و قوليله انا اسف ...

واهم اساسيات التدريب انك تكوني وجه لوجه مع الطفل اثناء التدريب يعني تنزلي لمستواه *وتكوني قريبه عشان يشوف وجهك لان التواصل البصري مهم وركزي على كلمه شوف عيني واشري على عينك وخليله يأشر على عينه خاصه عند تعليم الطلب ويكون جنبك الغرض الي بتعلميه يطلبه عشان يسهل عليه يطلب منك *في البدايه بمساعده كليه يعني تمسكي يده وتشيلي الغرض وتحطيه بيدك لين ما يفهم ايش قصدك و يبدا يطلب بعدين شوي شوي ابعدي شوفي لو كنتي بعيده عنه يطلب وله لا لازم تعلميه على كل شيء خطوه خطوه يعني تمسكيه وتوديه للشيء اذا ما يعرف *وبعد كذا مره بعدين شوفيه يجي يطلب منك وله لا *واهم شيء تنتظري وتصبري وتستمري *لانها تحتاج لوقت و كل طفل يختلف عن الاخر بالاستجابه يعني احتمال بعضها سريعه وبعضها بطيئه تاخذ وقت طويل سنه او سنتين *وانتي بس تعرفي ايش المدخل لطفلك عشان يتحمس *ولا تستعجلي على النتيجه استمري لين يتقن التواصل والتفاعل الاجتماعي الصحيح ويبدا يتحسن اكثر واكثر بإذن الله متى ما الطفل بدت تنظم افكاره ويتحسن تواصله ويقلد تحسي يبدا ينطق كلمات بموضعها الصحيح يجي وقت الكلام بيتكلم بإذن الله

واعتبريها اسلوب حياه يعني لا تثاقليها حسيها انها ممتعه وتصيري تعليمك له مستمر في كل وقت بالبدايه تتعبي جدا بعدين تبدأي تفهمي الموضوع وتشوفي الاستجابه من الطفل و حتى الي عندك يتعلمو منك كيف يعلموه ويتعاملوا معه ويصيروا حتى هم لهم دور لان التفاعل الاجتماعي الكل يقدر يشارك فيه ويصير يتفاعل مع الكل

‏‫