صرح الفنان محمد صبحي بأنه ليس ضد فكرة تقديم مسلسل يتناول السيرة الذاتية للراحل أحمد زكي موضحا "لما اتسألت قولت إنه أحمد زكي نفسه لما عمل عبد الحليم حافظ كنت ضده، رغم إنّه كان عبقري في عبد الناصر وفي السادات".
وأضاف صبحي خلال مداخلة هاتفية ببرنامج "التاسعة" مع الإعلامي وائل الإبراشي، على القناة الأولى المصرية: "قولت إني مش شايف مين يجسد شخصية الفنان أحمد زكي، وقولت اللي عاوز يجسد شخصية فنان يستنى بعد 50 سنة، عشان الجمهور لما يلاقي ممثل بيعمل الدور ده يبقى فاهم، لكن شوفت ممثل له طبيعة معينة وشكل معين وطريقة تمثيل معينة وشكل معين، ومينفعش نختار بالشكل بس".

ولفت "أتمنى محمد رمضان ميعملش ده ويفشل، وأتمنى صورة أحمد زكي متتهزش عند المشاهد، لأنه الجهمور شايله أعمال كبيرة جدا".

وأكد محمد صبحي أن أحمد زكي له تركيبة شخصية عند وجدان المشاهد مضيفا "هو إنسان معندهوش حاجة تانية غير الفن، أحمد زكي اتوفى وهو معندهوش فلوس، أحمد زكي مكانش بيشتغل عشان الفلوس، أحمد زكي بالعافية عنده عربية، لما يبقى في وجدان الناس محمد رمضان بيعمل نوعية من المسلسلات

والأكشن والغنا، وراجل خلى الجمهور يشوف بيته والـ4 عربيات، المشاهد هيقول أحمد زكي مش كدا، وعشان كدا أفضل يفضل أحمد زكي يظل عند الجمهور بعظمته وجماله، وأحمد زكي مكانش في حياته حاجة تانية عشان نحولها لسيناريو، وحياته آكل شارب نايم، اتجوز وطلق كله، كان في الفن وما يقدمه أهم حاجة في مذكراته فنه، ولازم يكون في حرص شديد جدا".

يذكر أن قناة "dmc دراما" تعيد عرض الجزء الثاني من مسلسل "يوميات ونيس" في السابعة مساء.
مسلسل "يوميات ونيس" قُدم منه 8 أجزاء، تم عرض الجزء الأول منه عام 1994، والأخير في 2013.
وشارك في بطولته كل من محمد صبحي وسعاد نصر وجميل راتب وعبد الله مشرف وسامح الشجيع وهدى هاني وهادي خفاجي وريم أحمد ومن تأليف مهدي يوسف ومحمد صبحي وإخراج أحمد بدر الدين ومحمد صبحي