يوميات زوجة مفروسة بكرة نجلس على الحيطة ونسمع الزيطة

السلام عليكم يا حبايبي
كيفكم وكيف من يعز عليكم
اليوم فرستي راح تكون غير غير ولها مناسبة جاية بعد العيد بالتحديد يوم (١٠/١٠ )
ايووووا ابغى اتكلم عن قيادة المراة
القرار اللي أمر فيه خادم الحرمين الشرفين
شوفوا يا جماعة الخير بقول لكم شي اذا ولي الامر امر بشى احنا ما السمع والطاعة ولاة الامر لهم نظرة بعيدة المدى. وخلاص بلاش الهرج والمرج اللي ماله داعي
وكل واحد ينام على الجنب اللي يريحوا
يعني اللي ماتبغى تسوق براحتها لا تجلس تشوشرعلى غيرها
في حريم محتاجين انهم يسوقوا ارامل ومطلقات ومقطوعات من شجرة ما عندهم رجال
وفِي كمان متزوجات لكن أزواجهم. يكونوا مشغولين اللي زوجها شغال بمستشفى واللي بالمطار ومصانع نظام ورديات يعني في ايّام يقدر وأيام مازيقدر خصوصا لما أكون موظفة يعني تحتاج انها تسوق
تقولوا لي في سواق. ايوا حبيبتي فيه لكن اكثر الناس ما عندهم إمكانية يجيبوا سواق
غير المشاكل اللي تجي من السواقين من خراب سيارات ونهبه فلوس البنزين واستخدامهم للسيارة لأغراضهم الشخصية
غير صنقرة السواق اللي ممكن في دقيقة يرمي المفتاح في وجهك
مرة عمتي رحمة الله عليها كانت جاية من المسجد ايّام رمضان الفضيل الف رحمة ونور عليها بس عشان وقفت السواق كم مكان تبغى تشتري خضرة وفواكة للبيت الا يزعل البعيد ويرمي لها مفتاح السيارة عليها ىيتزكها في نص الشارع وكانت عمتي حبيبتي لوحدها ماعندها احد وصارت تصيح وتبكي وحاول اهل الخير ساعدوها
قصروا
يا جماعة الخير تفالوا بالخير تجدوه. ليه التشائم ذَا من سواقة الحرمة وتنزلوا ذيك النكت الماسخه اللي مالها طعم
اللي يقول بكتب وصيتي قبل لا اطلع
واللي يقول بدخل سيارتي الحوش وأخذ اجازة الى ان يستتب الوضع يا هوا ليه كذا
ليه تكسير المجاديف ليييه؟
وانتوا عارفين اننا احنا الحريم. السعوديات ماشاء الله حولنا بنتقن كل شي ما جات على سيارة
انا يا جماعة الخير كنت معترضةعلى السواقة لكن اااه ايش رماك على المر قلت اللي امر منه
انا ابو ايمن طول وقته مسافروشغل وانا ادمية اشتغل يلا هانت متى اتقاعد بس
اوبر وكريم نحل وبري كل يوم ٨٠ ريال صباح وأحيانا اكثر وشرحه أو اكثر وقت الرجعة تدروا انا في الشمال ودوامي في الخمرة وتدروا صعوبه النقل الداخلي وغيرة
فقررت اني اتعلَّم السواقة حتى لو ما سقت يصير وقت الضرورة.
وبكرة تشوفوا انتظام الحريم وسواقتهم الهادية يس إنتوا لا تربشونا وتدقوا لنا بواري كثير عشان لا نتلخبط
هنا كمان اتكلم معاكم يا حريم حسك عينك تضبطي كحلتك ولا حمرتك في مراياة السيارة هذي حطينها عشان تشوفي اللي وراكي يا حبيبتي
حافظي على نفسك والبسي قنعتك واستري نفسك كويس يا حبيبتي
وبيني للمعارضين انك قد المسئولية واحنا قدها بازن الله.
وانت يا سيد البيت شجع زوجتك وبنتك وأختك زود الثقة فيها لا تجلس تتريق ولا تقول لها موفالحة بالعكس اعطيها رسايل إيجابية وساعدها
اليوم حبايبي كانت ذي فرستي لليلة ويلا اشوفكم على خير يا حبايب