يوميات زوجة مفروسة " قال :متى بنيت القصر قاله: امس العصر "

السلام عليكم حبايب القلب اوحشوني مرة ووحشتني هرجتي معاكم
اليوم بحكي لكم كذا حكاية فرستني مرة
هذا ايّام زمان لما كنّا ساكنيين في العتيبة قبل ما تجوز كان بيتنا كذا فوق الجبل تعرفوا مكه الله يعمرها كلها جبال. المهم يا حبايب اتزكر جاوا جماعة كذا على قد حالهم سكنوا أسفل الجبل في البيت القديم.
كانوا ناس على قد حالهم مررة أزا لقوا حق الغذا ما لقوا حق العشاء والأب كان يشتغل حمال والام كان في عندهم معزة تسوي الجبن وتبيع حليب وكانوا اهل الخير من غير منه يعطوهم المقسوم وسبحان الله تمر الأيام والسنين. ويجي الهدد على بيتهم وثمنته الحكومه وماشاء الله تبارك الرحمن جاهم خير يغطي عين الشمس
وراحوا نزولوا على جدة واشتروا لهم بيت وأبوهم سواء مشروع وماشاء الله ربي رزقه من واااسع
وتروح الأيام وتجي السنين وانقطعنا عنهم
وانا اتجوز وانزل جدة وواتلهي بالبيت وتربية الأولاد
المهم يوم من الأيام كنت معزومة عند وحدة اعرفها كانت عاملة كذا سهرة حقت تعارف
لما دخلت يا جماعة الخير واشوف وحدة تقول يا ارض اتهدي من عليكي قدي جالسة حاطة رجل على رجل ورافعه طراطيف خشمها في السماء وهي جالسه تتكلم ايّام. زمان بيتنا في ثلاث شغالات وبابا كان يودينا نسافر برا كل سنه وماما مدري ايش شكلوا وَبيت جدتي في الطايف كان فيه بستان ومن الهرج المعنطز والآدمية تهرج وانا اطالع فبها الآدمية ذي وجهها مو غريب عليا انا شايفتها وقد تكلمت معها بس فين يا ام ايمن !!!
وهرجة في درجة الا وحدة تقول لها اقول لك حبيبتي لو جوكم خطاب لبنتك الله يحفظها توافقوا
الا اندارت عليها والله ما ادري بس لازم يكون أصل وفصل ولد ناس متربي وتكون وظيفته كويسه
ردت علبها الحرمة قالت : هما أصل وفصل الصراحة والولد ماعليها غبار موظف مخلص جامعة يشتغل في الصحة واهله مستورين عندهم بيتهم ملك ساكنين فيه
الا الادمية تقولي احد قرصها قالت :لا لا الصراحة اذا ماكانوا من نفس مستوانا الاجتماعي والمادي ما نقبل خليه يدور على وحدة من مستوه. انا اتفرست منها قلت لها ليه يا حبيبتي يمكن لما تتجوزا بنتك ربنا يرزقه من واسع فضله الا الحرمة شمقت فيا ذيك التشميقة الا قلت لها حبيبتي والله وجهك مو غريب عليا انتي من بيت مين قلتي ؟ الا رفعت خشمها وقالت احنا من بيت حافظ المنخل ،،، المنخل وي وي انتي امك اسمها فاطمة الا ردت قالت ايوا وقمت قلت لها وعندك اخت اسمها رضية وإخوكي اسمه سعيد واخوكي الثاني مصطفي ماعرفتيني ؟الحرمة قالت : لا ما عرفتك !!! قلت لها انا احنا جيرانكم اللي كنّا ساكنين في اعلى الجبل في العتيبة الا الحرمة وجهها حمر ونقزت ذيك النقزة كانه لأذغها عقرب وقالت والله موفاكرة مو فاكرة يمكن تشابة اسماء قلت لها تشابة اسماء حتى في اسماء الاخوان انا كنت انزل عندكم العب وكانت عندكم زريبة في بيتكم. ونلعب مع الغنم الحريم صاروا يطالعوا فيها وفيا. وشكلي انا عكيت المهم. قلت خلني ازبط المسئلة عشان لا تتحرج الحرمة اكثر قلت لها عندك اخت اسمها أنيسه الا كان وجهها رد مكانه قالت لا قلت لها اجل تشابة اسماء اعذريني. وجاء وقت العشاء وفتحوا البوفية واعتمدت اجلس جنبها واحنا نأكل وبعد ما خلصنا الاكل. مسكتها قلت لها ابغاكي في كلمة ردت قالت لي خير قلت لها انا اتعمدت أني اقول اسم اخت ثانية عشان لا تنحرجي بس يا اختي جيران وبينا عيش وملح والعشرة ما تهون الا على قليل الاصل ابوكي كان رجال طيب وابن حلال حتى امك يا محلى الجبنه اللي كانت تعملها من المعزة الواحد ماينكر اصله وما يتكبر على الناس ويتعنطز لان هذي الدنيا دوارة يوم لك ويوم عليك ربنا كرمكم من واسع فضله وربي يبارك لكم بس مايصير الواحد ينكر أصله. ها معايا حق أو لا ؟ ردت عليا والله معاكي حق بس ساعات المجتمع يفرض علينا كذا قلت لها يا ستي ما بنى على باطل هوا باطل طيب انا اليوم سكت يمكن احد ثاني يجي يهرج ايش راح يكون موقفك والله الادمية تقبلت كلامي وقالت لي الله يعطيكي العافية والله صح كلامك وتبادلتا الأرقام. وصرنا صحبات اكثر ونتزكر طفولتنا قدام الناس واحنا كلنا فخر
يا جماعة الخير الواحد لا ينكر اصلة مافي داعي البهرجة الكزابة لان حبل الكذب قصير وكانت ذي فرستي لليوم ويلا حبايبي اشوفكم على خير