يوميات زوجة مفروسة مواليد برج الكلب " اليوم الثالث "

السلام عليكم يا حبايب قلبي
والله أني احبكم حب بنات المدينة للشريك وحشتوني وكيف فؤادكم الصائم ان شاء الله على النعيم دايم
بحكيكم فرسة من فرساتي
هذا يا طويلين العمر والسلامة كنت مرة رايحة السوق مع ابونا قلت بدل ما اخلي كومار يوديني اخلي ابو ايمن ياخذني للسوق منه ادبسه في كم غرض ومنه نتمشى مع بعض ودخلنا مواقف السوق دنيا زحمة ترشي الملح ما تشوفوه ندور على موقف للسيارة مو لاقين اللي ملصق سيارته في الجدر وواحد هذا لو شفته دبجته على راسوا موقف سيارته في نص أخذ حق موقفين لأانه موقف كويس ولا كمان محلي احد يوقف جنبه وجلسنا ابو ربع ساعة نلف وندور الى ان راسي داج ماني شايفة الطريق الا ويقولي ابو ايمن هيا افرحي لقيت موقف جنب الباب بيني وبينكم ماصدقت خبرا من اول واحنا ندوج ندور موقف وراح الليل في لضم الهيل واضرب عيني اترنوا الراجل موقف السيارة في مواقف ذوي الاحتياجات الخاصة واندرت عليه قلت له :يا راجل انت بعقلك ولا كيف؟!!! ، توقف في مكان الناس المحتاجة. انت ايش طينتك،، الا جلس يضحك وقال لي : ياستي انزلي مين شايفك ياللي في الظلام. تغمز انزلي انزلي بلا كلام فاضي ليه انتي شايفتهم مرطرطين وبعدين احنا كلها ساعة زمن وراجعين وشايفة مالقينا موقف والعشاء أذن ،، بيني وبينكم قلبتها كذا قلت هما كم محل ويارب نرجع قبل لأحد يجي بس طلبت من ابو ايمن يكتب رقم جواله على القزاز حق السيارة تشان لو احد محتاج الموقف يكلمنا وافق وكتب رقمه لكن المصيبة ان بطارية جواله كانت على وشك الانتهاء وطول ما احنا في السوق أسئلة احد دق عليك يقولي لا وجلسنا بالسوق ابو ساعة ونص ودبسته في الأغراض واحنا راجعين ونشوف واحد بعربيته يدف نفسه بين السيارات وبيني وبينكم انا انعميت ما قمت اشوف اللي قدامي وأبونا صار يصبصب عرق قمت قلت لابوايمن:الحق الراجل ساعده وهول مسكين يدف نفسه بين السيارات قام راح يجري عليه وصار يدفه بالعربية الى ان وصل لمدخل المول وحكى له الراجل انه حاول يوقف في المواقف الخاصة بيه بس ما قدر لان في احد موقف مكانه وحاول يتصل بالرقم الموجود لكن الجوال مغلق . انا ما صدقت خبر وجئت لأبو ايمن وقلت له اطلب منه مفاتيح سيارته و وقفها مكان سيارتنا قام ابونا يتأسف له وقال له انه هوا اللي موقف وانه ما انتبه ان الجوال مخلصة بطاريته المهم وقف سيارته مكان سيارتنا واحنا في الطريق رجعت فتحت الموضوع مع ابو ايمن وانه تصرفه كان غلط من اساسه وانا شاركته هذا التصرف الغلط الدولة ما قصرت بتساعد ذوي الاحتياجات الخاصة وتوفر لهم سبل كل الراحة وواجب علينا كأفراد مجتمع اننا نرتقي ونتصرف ونتقيد بالانظمة والتعاليم اللي حاطتها الدولة مو نسوي العكس
في ناس بعيد عنكم وعن السامعين ماعندهم احترام للقوانين سواء في المواقف أو الطريق همهم نفسهم ولا همهم احد ونسيوا ان الواحد زي مايفكر في نفسه يفكر في غيرة هذول بعيد عنكم اللي من برج ..........
وحطيت لأبو ايمن خرصة في أُذنة انه ما عاد يعيد الحركة ذي تاني أبدا
كانت ذي واحدة من فرساتي هيا خليني الحق أقوم اعمل سحوري في أمان الله